အခန်းကိစ္စ

ကျတော်အခု တက်တဲ့ကျောင်းမှာ ငှာနကထောက်ပံ့တဲ့ အဆောင်တစ်ခုမှာ နေရပါတယ်။ စာသင်နှစ် တစ်ခုကုန်တိုင်း အခန်းပြောင်းနေရပါတယ်။ အခုအဲဒီအဆောင်မှာ ငှာနက ထောက်ခံစာမပို့လို့ အဆောင်က ဆက်မထားချင်ဘူး ဖြစ်နေပါတယ်။ အခန်းပြောင်းရတော့လည်း ဒီပြင့်လူတွေနဲ့ မျှနေရပါတယ်။ ငှာနကို သွားပြောတော့ ကျတော်နေဖို့ သက်တမ်းစေ့သွားပြီလို့ ပြောပါတယ်။ ဒါပေမယ့် အတတ်နိုင်ဆုံး ကူညီပေးမယ်လို့ပြောပါတယ်။ အဲဒါ ဘယ်လို ဖြစ်မလဲဆိုတာ အရမ်းသိချင်ပါတယ်။ ကျေးဇူးတင်ပါတယ်။

ခင်မင်လေးစားစွာဖြင့်
ကိုရဲလေး

ကိုရဲလေးရဲ့ မေးခွန်းက နည်းနည်းရှုပ်နေတော့ နားလည်သလိုပဲ နားလည်ပြီး ဖြေရှင်းပေးပါမယ်။ အဲဒီအတွက် သုံးကတ်ဆွဲနည်းနဲ့ပဲ လီနော်မန်ကတ်ပြားသုံးကတ်ကို ဆွဲကြည့်လိုက်ပါတယ်။ ကံကြမ္မာက ပေးလာတဲ့ ကတ်ပြားသုံးချပ်ကတော့ အောက်ကအတိုင်းပါ။

Birds + Cross + Clover

ကတ်ပြားတစ်ချပ်ခြင်းရဲ့ အဟောတွေကို ကောက်ကြည့်မယ်ဆိုရင် Birds ဆိုတဲ့ ငှက်ကတ်ပြားက ယာယီ အခက်အခဲ၊ စိတ်လှုပ်ရှားခြင်း၊ အပြောင်းအလွဲရှိခြင်း ခရီးတိုရှိခြင်း တို့ကို ပြဆိုတာပါ။ Cross ဆိုတဲ့ လက်ဝါးကပ်တိုင် ကတ်ပြားက ရှောင်လွှဲရခက်တဲ့ ကံကြမ္မာ၊ ခက်ခဲပင်ပန်းခြင်း၊ စစ်ဆေးမေးမြန်း ခံရခြင်း စမ်းသပ်ခံရခြင်း စတာတွေနဲ့ ပတ်သက်ပါတယ်။ အဲဒီကတ်ပြားဟာ လမ်းစပျောက်ပြီး စလုံးရေပြန်စရမယ် ဆိုတာကိုလည်း ပြဆိုပါတယ်။ စိတ်ရှည်စွာစောင့်စားရမှာဖြစ်ပြီး ဒုက္ခတွေက သင့်ကို သင်ကြားသွားမယ် လို့လည်း ယူဆရပါတယ်။ နောက်ဆုံး The Clover ဆိုတဲ့ ဆေးပင်ကတော့ ကောင်းတဲ့ကတ်ပြားပါ။ အခွင့်အလမ်းတွေ ကောင်းတဲ့ကံတွေ ရရှိလာနိုင်ပါတယ်။

အတွဲကတ်အနေနဲ့ ကြည့်ရရင် The Cross ဆိုတဲ့ကတ်ဟာ Master Card လို့တင်စားရမယ့် ကတ်တစ်ခု ဖြစ်ပါတယ်။ ဒီပြင့်ကတ်တွေရဲ့လွှမ်းမိုးမှုအစား အခြားကတ်တွေအပေါ် သူ့ရဲ့ လွှမ်းမိုးမှုက ပိုသက်ရောက်ပါတယ်။ အခု ဖြန့်ကျက်မှုမှာ The Cross ကတ်ပြားက The Clover ရဲ့ ရှေ့ကလာတဲ့အတွက် သူရဲ့ လွှမ်းမိုးမှုဟာ Clover ရဲ့ ကောင်းတဲ့ကံကို ပိုပြီးတိုးမြှင့်ပေးမယ် (သို့မဟုတ်) အဲဒီ ဆိုးတဲ့ ကိစ္စဟာ အတွေးထဲမှာတင်ပဲ ပျောက်ပျက်သွားနိုင်ပါတယ်လို့ ပြောပါရစေ။ The Birds ကတ်ရဲ့ နောက်ကလာတဲ့အတွက် အဲဒီကတ်ရဲ့ အကျိုးသက်ရောက်မှုကိုတော့ လျော့နည်းစေမှာဖြစ်လို့ ယာယီ ပြောင်းရွေ့ရခြင်းစတာတွေကို မဖြစ်နိုင်ဘူးလို့ ယူဆရပါတယ်။

အနှစ်ချုပ်ဆိုရရင် ကိုရဲလေးဟာ အခန်းကိစ္စနဲ့ ပတ်သက်ပြီး လောလောဆယ် စိတ်ညစ်နေရပြီး စစ်ဆေးမေးမြန်းခံရတာကို ဖြေရှင်းနေရတာတွေနဲ့ ကြုံရပါမယ်။ ဒါပေမယ့် လောလောဆယ် (ခုလတ်တလော) မှာ အခန်းပြောင်းရဖို့ မရှိနိုင်ဘူးလို့ ပြောပါရစေ။ ဒါပေမယ့် စိတ်ရှည်ရှည်နဲ့ သည်းညည်းခံ စောင့်ဆိုင်းရမှာဖြစ်ပြီး ကောင်းတဲ့သတင်းတွေ၊ အခွင့်အလမ်းတွေ မကြာမီ ဖြစ်လာမယ်လို့ ပြောပါရစေ။

အဆင်ပြေမည်ဟု မျှော်လင့်ယုံကြည်လျက်
အုပ်စိုး